Tiranë, 23 qershor 2010 – Komisionerët e zgjedhjeve do të diskutojnë një forum për çështjet e administrimit të zgjedhjeve, në një forum të iniciuar nga Komisioni Qendror i Zgjedhjeve me ndihmën e prezencës së OSBE-së në Shqipëri.
Lajmi konfirmohet për agjencinë e Lajmeve NOA nga burimet zyrtare të OSBE-së sipas të cilave, në këtë forum, pjesëmarrësit do të shkëmbejnë përvojën e tyre në administrimin e zgjedhjeve parlamentare të vitit 2009.
Sikundër, ata do të diskutojnë lidhur me sfidat e hasura dhe do të dalin me sugjerime për përmirësimin e mëtejshëm të aspekteve teknike të administrimit të zgjedhjeve.
“Kjo veprimtari shërben, gjithashtu, për të forcuar lidhjen mes KQZ-së dhe komisioneve të nivelit të mesëm jashtë periudhës zgjedhore”, citojnë burimet e OSBE-së.
Konkretisht, ndër pjesëmarrësit e këtij forumi do të jenë 50 kryetarë dhe nënkryetarë të Komisioneve të Zonave të Administrimit Zgjedhor, të cilët përfaqësojnë më shumë se një të tretën e numrit të përgjithshëm të këtyre komisioneve, si dhe përfaqësues të organizatave vendase që merren me çështjet zgjedhore.
n.e/NOA
