Tiranë, 24 Qershor, NOA – “Reformë zgjedhore pa transparencë për zgjedhjet, nuk mund të bëhet. Dhe shurdhëria e kokëfortësia e qeverisë nuk mund t’i imponohet kërkesës së opozitës për transparencë”.
Me këto fjalë, deputeti socialist Namik Dokle, ka komentuar në seancën e sotme plenare aktin e miratimit të Rezolutës së Parlamentit Evropian për Shqipërinë, duke vënë në dukje vetëm anën e saj ku flitet për problematikat zgjedhore.
“Rezoluta e Parlamentit Evropian vë në dukje një sërë parregullsish të vëna re në procesin zgjedhor të 28 qershorit dhe kërkon hetim rreth tyre”, tha në fjalimin e tij deputeti Dokle.
Duke ritheksuar kërkesën e kahershme të opozitës për të hapur kutitë e votimit.
“Hapni kutitë, lironi vizat dhe çlironi ekonominë”, ka qenë thirrja e deputetit socialist nga foltorja e Kuvendit.
“Të gjithë e dinë se çfarë është fshehur në ato kuti ndaj bëni transparencën. Silluni si qeveri dhe si mazhorancë”, apeloi përfaqësuesi socialist.
n.e/NOA
