Shqipëria Partnere E Shkëlqyer Në Fushën E Energjisë
Ë
- Parlamenti organizon workshop-in "Zbatimi i Traktatit të Komunitetit të Energjisë (EnC)" -
TIRANË, 25 Qershor/ATSH/.- Zbatimi i strategjisë rajonale për energjinë dhe gazin në vendet e rajonit, bashkëpunimi mes parlamenteve për ndryshimet e ligjeve mbi energjinë dhe tregjet në këtë sektor, siguria dhe qëndrueshmëria e furnizimit në kontekstin e ndryshimeve klimatike, ishin disa nga temat e diskutuara në workshop-in "Zbatimi i Traktatit të Komunitetit të Energjisë (EnC)", zhvilluar sot në Kuvendin e Shqipërisë.
Gjatë aktivitetit, që u organizua në bashkëpunim me Këshillin e Bashkëpunimit Rajonal (RCC), Kuvendin dhe Sekretariatin e Komunitetit të Energjisë, kryetari i Komisionit për veprimtarinë prodhuese, Jemin Gjana theksoi se roli i parlamenteve në zhvillimin e tregjeve energjitike është esencial, pasi bashkëpunimi efikas në këtë fushë arrihet dhe me standartizimin europian të ligjeve.
Drejtori i Sekretariatit të EnC Slavtcho Neykov dhe Eksperti i Lartë në Infrastrukturë dhe Energji pranë Sekretariatit të RCC, Miroslav Kukobat, evidentuan ndër të tjera zbatimin teknik të strategjisë së energjisë, rritjes dhe kapaciteteve të parlamenteve në monitorimin e reformave ekzekutive në energji, çështjet e transparencës, luftës kundër korrupsionit në zhvillimin e tregjeve.
Prezantuesit e cilësuan Shqipërinë si një anëtare të përkushtuar të Komunitetit të Energjisë dhe një partner të shkëlqyer.
Neykov, ndër të tjera, theksoi se "duke u kthyer në një shembull të shkëlqyer për hapat e ndërmarrë në zhvillimin e sektorëve të ndryshëm, veçanërisht të energjisë, hartimin e legjislacionit dhe përshtatjen e tij me traktatet për energjinë, Shqipëria ka dhënë një mesazh shumë të rëndësishëm ndaj investitorëve dhe BE-së përmes politikës "ne e dimë ç'po bëjmë dhe e dimë ku duam të shkojmë", tha ndër të tjera Neykov. /a.s//n.m/
