Tiranë, 27 qershor, NOA – Deklarata e përfaqësuesve të Partisë Popullore Europiane është cilësuar nga Partia Demokratike si mesazhi më i qartë për Kryetarin e Partisë Socialiste, Edi Rama. Në një deklaratë për mediat deputeti i PD-së, Flmur Noka u shpreh se Rama duhet të dëgjojë qëndrimet e ndërkombëtarë dhe të mos dal kundër BE.
“I kërkojmë zotit Rama të vërë vath në vesh çfarë i kërkon Europa dhe i themi zotit Edvin se është i turpshëm sulmi dëshpërues që po organizon ndaj këtyre liderëve europianë, përmes zëdhënësve të neveritshëm rreth tij”, u shpreh Noka.
Ai theksoi se deklarata e bërë nga PPE, Presidenti i saj, Martens dhe koordinatorët e grupit të ministrave të jashtëm: Franco Fratini dhe Elmar Brok është mbështetje të Shqipërisë dhe të qeverisë së Kryeministrit Sali Berisha.
Noka u ndal në qëndrimin e PPE e cila thekson se Kryetarit të PS i janë bërë shumë lëshime.
“Liderët e mëdhenj europianë theksojnë se “Qeveria shqiptare ka bërë një numër të madh koncesionesh për të plotësuar kërkesat e opozitës. Kryeministri Berisha u ka ofruar atyre shumicën dhe kryesimin e një komisioni hetimor parlamentar”, u shpreh Noka.
Ai theksoi se liderët europianë popullor i kërkojnë Ramës të respektojë Kushtetutën e të veprojë konform shtetit ligjor, duke i kujtuar se ky është kriter i Kopenhagenit.
“Por sa më shumë koncensione bënte Berisha, theksojnë liderët europianë, Edi Rama bënte vazhdimisht kërkesa të reja, të cilat bien në kundërshtim me Kushtetutën, ligjin zgjedhor dhe vendimet e mëparshme gjyqësore”, u shpreh Noka.
NOA
