Tiranë, 28 qershor, NOA – Partia Demokristiane deklaroi sot se aksioni i ndërmarrë prej Inspektoriatit Kombëtar të Ndërtimit për shembjen e ndërtimeve pa leje në kulmin e sezonit turistik, është i paprecedent dhe po dëmton rëndë jo vetëm pronën dhe interesat e qytetarëve, por edhe imazhin turistik të vendit.
Në një deklaratë për shtyp, PDK e cilëson të papranueshme këtë fushatë shembjesh të ndërtimeve në bregdet.
Kjo parti madje nënvizon se shembjet po bëhen në mënyrë selektive dhe sipas një motivacioni politik, për të cilin PDK, i kërkon qeverisë që ta ndërpresë këtë fushatë shkatërrimesh në zonat turistike gjatë muajve të verës.
Sipas Partisë Demokristiane kjo politike e qeverisë shqiptare po sjell dështimin e këtij sezoni turistik, duke nxjerrë jashtë funksionit disa prej zonave turistike më të bukura të vendit dhe duke dëmtuar imazhin e Shqipërisë në sytë e turistëve dhe pushuesve të huaj.
mit/NOA