Doganat Tejkalojnë Planin E Të Ardhurave
TIRANË, 3 Korrik/ ATSH/- Të ardhurat doganore në 6-mujorin e parë të vitit janë tejkaluar me 15.7% më shumë se e njejtja periudhë e vitit të kaluar, ndërsa janë tejkaluar gjithashtu dhe të ardhurat doganore për muajin Qershor.
Administrata doganore bën të ditur se në 6-mujorin e parë të vitit ka arkëtuar 20107.52 mld lekë më shumë, ose me një rritje prej 15.78% më tepër se 6 mujori i parë 2009.
Gjithashtu, Doganat njoftojnë se në muajin qershor 2010 janë arkëtuar 10, 32 miliard lekë nga 9,94 miliard lekë të planifikuara, duke realizuar planin e të ardhurave në masën 104% ose me një tejkalim prej 381 milion lekësh.
Eksportet shqiptare pësuan rritje gjatë 6 mujorit të parë në sasi e vlerë krahasuar me 6 mujorin të parë të 2009. I shprehur në sasi, volumi i eksporteve shqiptare arriti 1071.7 mijë ton, nga 603.2 ton të regjistruar me të njëtjën periudhë të një viti më parë, me një rritje prej 468.5 mijë ton, ose 77.7 % më shumë.
Ndërsa si vlerë e eksporteve shqiptare në 6 muajt e parë të vitit 2010 u realizua një volum në vlerën prej 39.6 mld lekë, me një rritje prej 24.3 mld lekë, ose 159% më shumë krahasuar me të njëjtën periudhë të vitit 2009, kohë ku realizua një vlerë prej 15.3 mld lekë eksporte./s.d//n.m/
