Zv. Kryeministri dhe Ministri i Punëve të Jashtme, z. Ilir Meta, mori pjesë në Takimin e Komisionit të Partneritetit të Kartës së Adriatikut në Dubrovnik
ME SHUME FOTO, TE GALERIA
Dubrovnik, 9 Korrik 2010 NOA – Autoritetet shqiptare ofrojnë angazhimin për të asistuar Malin e Zi dhe Bosnje-Hercegovinën në përgatitjen e programeve vjetore kombëtare të këtyre vendeve në kuadër të Planit të Veprimit për Anëtarësim.
Pohimin e bëri sot zëvendëskryeministri dhe Ministri i Punëve të Jashtme, Ilir Meta, mori pjesë në Takimin e Komisionit të Partneritetit të Kartës së Adriatikut (A5), që u zhvillua në Dubrovnik, Kroaci.
Po ashtu, ai shprehu mbështetjen e Shqipërisë për aspiratat e Malit të Zi dhe Bosnje-Hercegovinës drejt anëtarësimit në NATO.
Zv. Kryeministri dhe Ministri i Punëve të Jashtme, z. Ilir Meta shprehu kënaqësinë për pjesëmarrjen e Ministrit të Punëve të Jashtme të Republikës së Kosovës, z. Skënder Hyseni.
Gjatë takimit Ministrat e Punëve të Jashtme të Shqipërisë, Bosnje-Hercegovinës, Kroacisë, Maqedonisë, Malit të Zi, Kosovës dhe përfaqësues të Departamentit të Shtetit të SHBA-së, diskutuan rreth integrimit euroatlantik të Evropës Juglindore, kontributit të përbashkët në operacionet për mbështetjen e paqes dhe përpjekjet në kuadër të diplomacisë publike.
Në fjalën e tij z. Meta theksoi angazhimin e Shqipërisë për të shqyrtuar kontributin e saj në të ardhmen në ekipe të përbashkëta të vendeve të Kartës në operacionin ISAF të drejtuar nga NATO në Afganistan.
Gjithashtu, z. Meta vlerësoi rolin e rëndësishëm të SHBA në mbështetje të aspiratave euroatlantike të vendeve anëtare të Kartës së Adriatikut, duke çmuar njëkohësisht kontributin e tyre në funksion të forcimit të mëtejshëm të paqes, stabilitetit dhe sigurisë në rajon dhe më gjerë.
Në përfundim të takimit, vendet anëtare të Kartës së Adriatikut miratuan një Komunikatë Finale, me anë të së cilës theksohet objektivi për stabilizimin afatgjatë dhe konsolidimin politik të Evropës Juglindore, vlerësohet roli i rëndësishëm që Karta e Adriatikut vazhdon të luajë në afrimin e vendeve tona me komunitetin euroatlantik dhe nxitjen e bashkëpunimit rajonal, shprehet angazhimi për kontribute të përbashkëta në kuadër të operacionit ISAF në Afganistan, si dhe shprehet rëndësia e rolit të diplomacisë publike për rritjen e mbështetjes së publikut për anëtarësimin në NATO dhe operacionet e drejtuara nga Aleanca.
Gjithashtu u mirëprit ftesa që iu bë Ministrave të Punëve të Jashtme të Serbisë dhe Kosovës për të marrë pjesë në punimet e këtij Ministeriali, në statusin e vëzhguesit si dhe u vlerësua pjesëmarrja për herë të parë e Kosovës në të, duke shprehur synimin e përbashkët për ta thelluar bashkëpunimin në këtë format në të ardhmen.
r.n/NOA
