Tirane: Ndahet Nga Jeta Shkrimtari Zyhdi Morava
TIRANE, 9 Korrik/ATSH/. - Pasditen e sotme eshte ndare nga jeta pas një sëmundje të rëndë shkrimtari Zyhdi Morava, një ndër të persekutuarit nga regjimi komunist, që vuajti burgimin në Spaç për idetë e tij të lirisë, njoftoi sotne ministria e Turizmit, Kultures, Rinise e Sporteve.
Zyhdi Morava lindi në fshatin Grace të Devollit më 14 mars 1946. Për motive politike internohet prej Tiranës në fshatin Yrshek, ndërsa dënohet në vitin 1978 me 8 vjet burg, ku vuajti denimin në Spaç të Mirditës.
Pas përmbysjes së diktaturës komuniste, Morava nisi të punojë për krijimin e Bashkimit të Sindikatave të Pavarura dhe Shoqatës së ish- të përndjekurve politikë, ndërsa në këto vite ushtron profesionin e gazetarit dhe shkruan vazhdimisht në gazeten "Sindikalisti", "E vërteta" dhe "Republika".
Pas vitit 1991, ka botuar shumë libra si në gjininë e poezise dhe prozës. Në morinë e veprave të tij janë novela "Hingëllimat e shiut", vëllimi me tregime "E papritura" etj, ndërsa në romanet më të njohura janë " E zhdukura", "Burri i të dashurës sime" si dhe e "Veçanta e një dashurie", që u vlerësua me çmimin kombëtar "Penda e Argjendë" akorduar nga Ministria e Turizmit, Kulturës, Rinisë dhe Sporteve si romani më i mirë për vitin 2005.
Në vitin 2005 Zyhdi Morava u zgjodh Kryetar i Lidhjes së Shkrimtarëve dhe Artistëve të Shqipërisë, të cilën e drejtoi për gati dy vjet.
Në vitin 2006 Morava dekorohet nga Presidenti i Republikës me titullin "Mjeshtër i Madh".
Homazhet ne nderim te z. Morava do te zhvillohen neser ne oren 10.00-11.00 ne hollin e Teatrit Kombetar. /a.ke/
