Dubrovnik, 10 Korrik, NOA – Shqipëria dhe Kroacia paraqesin nevojën e forcimit të bashkëpunimit ekonomik mes tyre.
Një fakt të tillë, kryeministri Berisha ia ka bërë me dije homologes së tij kroate, Jadranka Kosor, gjatë një takimi të përbashkët në Dubrovnik, ku po merr pjesë në samitin “Europa Juglindore, përballja me sfidat globale”, duke i bërë një ekspoze të mundësive për pjesëmarrje të kompanive kroate në projektet e infrastrukturës, përfshirë ato rrugore, portuale dhe energjetike.
Nga ana e saj, kryeministrja Kosor e falënderoi kryeministrin Berisha për pjesëmarrjen në Samitin e Dubrovnikut, më i rëndësishmi ky i mbajtur në Kroaci në vitet e fundit.
Ajo nënvizoi marrëdhëniet shumë të mira mes Kroacisë dhe Shqipërisë, si dhe e vlerësoi këtë takim si një mundësi shumë të mirë për forcimin e bashkëpunimit e marrëdhënieve ekonomike.
Më tej, Kosor vuri theks të veçantë në mundësitë e kompanive kroate në fushën e ndërtimit të infrastrukturës, si dhe turizmit.
Në fund, Berisha shprehu kënaqësinë për marrëdhëniet dypalëshe dhe
Kryeministri Berisha e falënderoi kryeministren Kosor për heqjen e përkohshme të vizave nga Kroacia për shtetasit shqiptarë.
Gjithashtu, ai e falënderoi për ekspertizën e dhënë nga pala kroate në procesin e përgatitjes së përgjigjeve për Pyetësorin e Komisionit Evropian dhe theksoi se Kroacia është një rast model për një proces integrimi në Bashkimin Evropian dhe anëtarësimi i afërt i saj është një porte e hapur më shumë edhe për Shqipërinë dhe vendet e tjera të rajonit që ndajnë të njëjtat aspirata.
Ndërsa Kosor e siguroi kryeministrin Berisha për mbështetjen e Kroacisë për Shqipërinë në këtë proces.
n.e/NOA
