Tiranë, 12 korrik, NOA – Duke iu referuar Shërbimit informativ Shtetëror, deputeti i Partisë Socialiste, Ilir Gjoni ka akuzuar kryeministrin Sali Berisha se do të përgjigjet përpara ligjit në rast se vijon përpjekjet destruktive për të vënë nën kontroll të gjitha institucionet e pavarura të shtetit, me qëllim fshehjen e problemeve alarmante që ka sot siguria në vend, problemet me krimin e organizuar dhe trafiqet.
Duke iu referuar projektligjigjit të debatuar të SHISH, në komisionin e sigurisë, dhe nismën më të fundit për ta përfshirë atë në seancën e datës 22 korrik, deputeti Gjoni shprehu shqetësimin se megjithë reagimin e ekspertëve vendas e ndërkombëtarë, qeveria edhe pse e ka shprehur tërheqjen, nuk ka ndryshuar mendje nga vendimi i saj për ta cënuar pavarësinë e SHISH-it.
Sipas Ilir Gjonit, fakti i përfshirjes në seancën e datës 22 Korrik 2010, mbështetet edhe nga një fakt akoma më shqetësues, që deputetëve të opozitës në Komisionin e Sigurisë, me gjithë insistimet e tyre, ende nuk u është vënë në dispozicion drafti, që do të kalojë për miratim.“Shqetësimi ynë serioz buron nga fakti se ky projektligj po tentohet të futet sërish në seancë për të realizuar objektivin e Sali Berishës për të vënë nën kontroll SHISH. Me këtë veprim Sali Berisha mesa duket hakmerret ndaj një raporti realist e të balancuar, që drejtori i SHISH-it bëri para Komisionit të Sigurisë, raport, i cili binte ndesh me situatën rozë, që mundohet të paraqesë qeveria sa i përket problemeve të sigurisë në vend kryesisht lufta kundër krimit të organizuar, trafiqeve e korrupsionit”, deklaroi deputeti i PS-së.
Sipas Gjonit, Berisha po shfrytëzon faktin se vëmëndja e ndërkombëtarëve është e shpërqendruar, për më tepër kur disa prej përfaqësuesve diplomatikë largohen nga vendi në përfundim të mandatit.
Duke iu referuar shkurtimeve të buxhetit, deputeti Partisë Socialiste, tha se kreu i mazhorancës po hakmerret ndaj këtij institucioni të sigurisë kombëtare duke e shkurtuar buxhetin e institucionit me plot 10 përqind në projektbuxhetin që pritet të miratohet.
“Nëse Sali Berisha mendon se përmes dhunës e tiranisë së shumicës mund të bëjë si të dojë, ne e paralajmërojmë të mbajë duart larg këtij institucioni dhe të gjithë institucioneve të tjera kushtetuese pasi pa më të voglin dyshim do të përgjigjet një ditë për zullumet e tij”, përfundoi deklaratën e tij, deputeti i PS-së, Ilir Gjoni.
mit/NOA
