Kosove - Kryeministri Thaci Mbeshtet Fuqishem Veprimet E Task Forces Antikorrupsion
PRISHTINË, 15 Korrik /ATSH-B.Jashari/.- Kryeministri Hashim Thaçi mbështet fuqishëm veprimet e Task Forcës së përbashkët antikorrupsion, të krijuar nga Qeveria e Republikës së Kosovës, në kuadër të luftës kundër korrupsionit dhe krimit të organizuar.
"Kryeministri Thaçi vlerëson se këto veprime janë në përputhshmëri të plotë me përkushtimet e Qeverisë së Republikës së Kosovës për sundimin e rendit dhe ligjit në Kosovë", theksohet në një komunikatë për media të dhënë pak më parë nga zyra e kryeministrit kosovar.
Me moton "Zero tolerancë ndaj korrupsionit dhe krimit të organizuar", shtohet në komunikatë, "Qeveria është e vendosur të vazhdojë përkushtimet e veta në luftë të pakompromis ndaj këtyre dukurive negative".
Më tej theksohet se "në këtë kuadër, janë edhe angazhimet dhe nisma për hartimin dhe miratimin e Ligjit Anti-mafia, me qëllim të parandalimit dhe goditjes së korrupsionit dhe krimit të organizuar". /a.ke/
