Tiranë, 23 korrik, NOA – Në mbledhjen e qeverisë kryeministri Sali Berisha u ndal në vendimin e Gjykatës Ndërkombëtare të Drejtësisë për pavarësinë e Kosovës duke e cilësuar atë si vendimin më të rëndësishëm për kombin.
Ai vlerësoi se gjithë bota i ka kushtuar një vëmendje të posaçme duke i dhënë të drejtë shqiptarëve. “Për herë të parë në historinë mijërave vjeçare e drejta e shqytarëve bëhet e drejtë botërore”, tha Berisha.Ai u shpreh se kjo nuk ka ndodhur se shqiptarët janë një komb i preferuar. Nga ana tjetër ai u shpreh se vendimi nuk është një ndëshkim për armiqtë. Berisha tha se vendimi erdhi për të dhënë të drejtën.
“Rasti ai Kosovës ishte suigeneris. Realisht një rast i paprecedent në historinë e botës”, tha Berisha.
“Nuk ishin shqiptarët që shkuan në gjykatë. Ata u paditën nga Serbia e cila shfrytëzoi të drejtat ndërkombëtare. Unë shpresoj dhe besoj se pala paditëse do t’i përmbahet vendimit të gjykatës në interesin më të mirë të paqes në rajon”, tha Berisha.
NOA
