SHIKONI FOTO ME REZOLUCION TE LARTE
Athinë, 2 Gusht 2010 NOA Update – Një polic grek u gjet i zhytur në trafik droge që udhëhiqej nga dy shqiptarë dhe një tjetër helen. Që të katër u arrestuan, një sasi e madhe droge dhe para që ju i shihni edhe në foto, u sekuestruan dhe hetimet do të vazhdojnë për të gjetur dhe të tjerë pjesëmarrës në rrjet.Korrespondenti i agjencisë NOA raporton se aksioni policor është kryer dy ditë më parë por sot është bërë publik zyrtarisht pasi të dyshuari dolën për rivlerësim mase sigurie.
Të arrestuarit janë dy shqiptarë, njëri 31 vjeç dhe tjetri një vit më i madh, si dhe dy grekë, përkatësisht 39 dhe 44 vjeç, i dyti, punonjës i policisë greke.
Arrestimi i të katërtëve u krye në një operacion antidrogë që u realizua në pak minuta tek qendra tregtare “Mall” në Athinë dhe u ndoq direkt nga shumë njerëz që gjendeshin atje.
Me arrestimin e të dyshuarve, gjithashtu u sekuestruan, marihuanë, 203 kg dhe 150 gramë, makinë autoveturë që shërbente për transportimin e lëndës narkotike, 32 fishekë të përmasave të ndryshme, 6 telefona celularë, 680 euro dhe një pistoletë me gjashtë fishekë.
Për të kryer operacionin e sotëm, policia tha se kishte plot katër muaj që mbante nën vëzhgim katër të dyshuarit.
Policia konkludoi pas marrjes në pyetje të të dyshuarve, se droga kishte mbërritur nga Shqipëria përmes dy shqiptarëve të arrestuar dhe në territorin grek depërtonte lirshëm derisa shitej në vend publik si qendra tregtare “Mall”, me ndihmën e policit grek dhe shokut të tij.
Aksioni u krye pikërisht kur dy shqiptarët po u dorëzonin mallin dy grekëve dhe në këtë kohë janë kapur “mat”.
Ditën e sotme, prokuroria kërkoi nga gjykata në Athinë, që për katër të dyshuarit të jepet masë sigurie e burgut deri në përfundim të hetimeve, kërkesë që u pranua nga togat e zeza.
n.s/r.n/NOA
