Washington, 9 shtator, NOA – Presidenti i Shteteve të Bashkuara të Amerikës, Barack Obama ka zgjedhur ditën e shenjtë të Bajramit të Madh, që përmbyll sakrificat e agjërimit të besimtarëve muslimanë gjatë muajit të madhënueshëm të Ramazanit, për t’i bërë apel pastorit të një kishe të vogël në Florida që të heqë dorë nga planet për djegien e Kuranit, të cilën pastori amerikan e ka paralajmëruar ta realizojë pikërisht të shtunën, në përvjetorin e nëntë të shpërthimit të kullave binjake, më 11 shtator të 2001-it, një ditë që përkon edhe me ditët e shenjta të Bajramit.
“Djegia e Kuranit është tërësisht kundër vlerave tona si amerikanë”, ka deklaruar për mediat amerikane shefi i Shtëpisë së Bardhë, i cili në politikat e tij po rreket të mbërrijë në paqëtimin e marrëdhënieve me të gjitha vendet e botës muslimane.
Zoti Obama i konsideroi planet për djegien Kuranit të shenjtë islam, si shkatërruese dhe një qëndrim i rrezikshëm, që do të ndihmonte terroristët e Al Kaidës të rekrutojnë militantë.
Edhe komandantët ushtarakë të SHBA-ve janë prononcuar se djegia e Kuranit mund të rrisë numrin e sulmeve kundër trupave amerikane në Afganistan apo në vende të tjera.
Por, prej ditësh panet e kishës së Floridas për të djegur qindra kopje të Kuranit kanë rritur zemërimin e besimtarëve në tërë botën.
Selia e shenjtë e krishtërimit, Vatikani i ka dënuar planet e pastorit të kishës së vogël në Florida.
Më herët, Presidenti i Indonezisë, Susilo Bambang Judoiono, i kishte kërkuar presidentit obama të ndërhynte personalisht për zgjidhjen e kësaj çështjeje, që lëndon dhe fyen rëndë besimtarët islamë në të gjithë botën e qytetëruar muslimane.
Madje, India dhe Pakistani i kërkuan autoriteteve amerikane të ndërmarrin veprime me forcë dhe që media amerikanë të mos e mbulojë ngjarjen, në rast se ajo do të bëhet realitet në 11 shtator.
Por, autoritetet amerikane janë shprehur se nuk mund të bëjnë shumë për të ndaluar djegien e Kuranit, pasi sipas tyre liria e fjalës garantohet në Kushtetutë.
Vetë, pastori i kishës që paralajmëroi djegien e Kuranit të shenjtë, ka deklaruar se djegia e qindra kopjeve të Kuranit më 11 shtator, në përvjetorin e sulmeve terroriste kundër SHBA-ve, synon të ngulitë në vëmendjen e botës, se islami është një fe e dhunshme.
mit/NOA