Lezhë, 17 shtator, NOA – Forcat e policisë së Lezhës kanë arrestuar sot në flagrancë, rreth orëve të para të mëngjesit, 59-vjeçarin Vesel Xhaferri, me banim në Thumanë të Krujës, i dënuar më parë për vrasje.
Siç ato konfirmojnë për agjencinë e Lajmeve NOA, arrestimi i këtij personi u bë për arsye se pas një kontrolli të ushtruar në një ndërtesë, e cila shërben për bagëtitë në pronësi të tij dhe që ndodhet në fshatin Shëmri të Mamurrasit, u gjet një arsenal i vërtetë armësh.
Konkretisht, atij iu gjendën dhe u sekuestruan në cilësinë e provës materiale një armë zjarri dhjetëshe mod.56, kalibër 7.62 mm; një armë gjuetie teke artizanale;
një sasi prej 1597 copë fishekë; 4 fishekë arme gjahu; një sasi prej 154 copë kallëpe dinamit; një sasi prej 53 copë kapsolla detonatore si edhe një fitil zjarr-përcjellës në sasinë 6.25 m.
Këto armë dhe municione i mbante pa leje Vesel Xhaferri, ndërsa nga ana e strukturave përkatëse të policisë janë kryer veprimet proceduriale për dokumentimin ligjor të kësaj vepre penale.
Ndërsa materialet proceduriale i kalojnë prokurorisë së Kurbinit për veprat penale të “Prodhim dhe mbajtje pa leje e armëve luftarake dhe e municionit” dhe ”Prodhim dhe mbajtje pa leje e armëve të gjuetisë dhe sportive” parashikuar nga nenet 278/2,3 dhe 280 të Kodit Penal.
n.e/NOA
