Tiranë, 4 tetor, NOA – Si kundërpërgjigje ndaj akuzave drejt ministres së Integrimit, selia blu vijon akuzat ndaj kryebashkiakut Edi Rama, selia blu menjëherë pas deklaratave të kryeministrit në mbledhjen e Grupit kuvendor të PD-së i ka kërkuar prokurorisë të hetojë këtë kontratë 20% dhe planin urbanistik për zonën, që janë sipas demokratëve dëshmia më flagrante e korrupsionit dhe mënyrës se si kryebashkiaku rama ka nënshtruar industrinë e ndërtimit këto vite në Tiranë.
“Prokuroria nuk mund të qëndrojë mënjanë para këtyre fakteve dhe provave të rënda në këtë aferë qindra milionëshe dhe as zoti Rama as sekseri i tij nuk mund t’i fshihen planit me pallate 35 katëshe. Është koha që drejtësia të veprojë”, bëri thirrje deputeti i Partisë demokratike, Aldo Bumçi.
Në këtë suazë ai deklaroi se “Kontrata në të cilën Tan Lepri ka 20% të aksioneve, përbën deri më sot dokumentin më të rëndë kundër Ramës dhe mënyrës se si ai ka përfituar në këto 10 vjet nga industria e ndërtimit nëpërmjet procesit të dhënieve të lejeve dhe miratimit të planeve të pjesshme”.
Deputeti i PD-së, Aldo Bumçi deklaroi në konferencën e sotme se “Faktet ligjore kundër zotit Rama, zotërisë 20%, janë më të dokumentuara dhe më publike se kurrë: pasi Tan Lepri është zotërues i 20% të aksioneve me sipërmarjen e ndërtimit”.
Sipas Bumçit, ndërtuesit e tjerë në këtë sipërmarje kanë deklaruar para organeve të drejtësisë se ky 20%-sh i është dhënë Tan Leprit, si mik i kryetarit të Bashkisë, Edi Rama dhe në këmbin të hartimit dhe miratimit të planit urbanistik, të cilën Bashkia e Tiranës e ka miratuar duke përfshirë ndërtimin e pallateve 35 kateshe, tha deputeti Aldo Bumçi.
i.t/NOA
