Tiranë, 11 tetor, NOA – Heqja e paralajmëruar e imunitetit të deputetit të Partisë Socialiste Ilir Beqja, po diskutohet aktualisht në një mbledhje të Këshillit kuvendor për Rregulloren, Mandatet dhe Imunitetin.
Ky organizëm i parlamentit është mbledhur sot paradite për të diskutuar mbi kërkesën, e cila u dorëzua në Kuvend më 1 tetor nga një grup deputetësh të Partisë Demokratike.
Këta të fundit e akuzojnë deputetin socialist për konflikt interesi, pasi sipas tyre, kompania e drejtuar prej tij, një vit më parë, fitoi tenderin për pajisjen e bashkisë së Durrësit me sistemin elektronik duke përfituar një kontratë prej 240 milionë lekësh.
Por deputeti socialist e ka kundërshtuar një fakt të tillë, duke theksuar se aktiviteti i kompanisë ishte zhvilluar kur ai nuk kishte qenë deputet. n.e/NOA
