Tiranë, 11 tetor, NOA – Lajmi i përhapur në një media të shkruar se Policia e Shtetit nuk ka para për të kryer hetime speciale, është i pavërtetë.
Sqarimin e ka dhënë vetë Policia e Shtetit përmes zëdhënëses së saj, Klejda Plangarica.
“E vërteta është se strukturat e policisë së shtetit kanë në disponim gjithë mjetet monetare dhe infrastrukturën e nevojshme për realizimin e operacioneve policore të çdo lloj niveli e vështirësie”, tha në një konferencë për mediat Plangarica.
Sipas saj, kjo e vërtetë është demonstruar edhe në operacionet e përbashkëta me partnerët ndërkombëtarë, të cilët e kanë konstatuar këtë gjatë punës së përbashkët për goditjen e rrjeteve kriminale të krimit të organizuar dhe krimeve të rënda.
Plangarica sqaroi më tej se për përdorimin e mjeteve monetare për operacionet e fshehta policore kërkohet zbatimi i rregullave rigoroze të sanksionuara posaçërisht për këtë qëllim.
Policia e Shtetit siguroi rishtas opinionin publik se është në shërbim të qytetarëve dhe se ka në dispozicion gjithë ekspertizën dhe mjetet e nevojshme për të realizuar detyrat e ngarkuara me ligj.
mit/NOA