Tiranë, 13 tetor, NOA - Deputeti i Partisë Demokratike, Fatbardh Kadilli i bëri rishtas thirrje sot prokurorisë të nisë hetimet mbi akuzat për afera korruptive dhe gjobëvënie prej 100 milion eurosh nga kryetari i Bashkisë së Tiranës, Edi Rama për projektin e pallateve 35 katësh të diga e Liqenit Artificial.
“Kryetari i Bashkisë Tiranës, Edi Rama, edhe sot nuk foli për skandalin e 20 përqindëshit, që e implikon atë deri në grykë, në projektin e gratacielëve 35- katësh tek Liqeni”, theksoi Kadilli.
Sipas Kadillit akuzat e lëshuara nuk janë thjesht një provë e rëndë korrupsioni, por është edhe mekanzimi i një sistemi të frikshëm, që vepron prej shumë vitesh në Shqipëri. Deputeti Kadilli bëri me dije se “Ideatori dhe frymëzuesi i këtij sistemi është kryetari i Bashkisë së Tiranës, Edvin Rama, kurse “leprat” janë thjesht aplikuesit në terren. Për fatin e mirë, ata tashmë janë kapur mat, pas publikimit të kontratës 20 përqindëshe dhe denoncimit të fuqishëm të saj”.
Në këtë suazë, deputeti demokrat i kujtoi Edi Ramës, se demokratët nuk do të rreshtin së kërkuari përgjegjësinë e tij direkte në këtë mega-aferë, përgjegjësi e cila duhet të jetë edhe ligjore, pasi është koha që kampionët e korrupsionit në kontinent të dalin para drejtësisë, tha deputeti Kadilli.
Në këtë kontekst zoti Kadilli bëri me dije se tashmë nuk duhet të heshtin më organet e drejtësisë, por t’i shkojnë deri në fund aferës prej 100 milion eurosh.
mit/NOA