Elbasan, 20 tetor, NOA – Nëntë persona janë plagosur sot në rrugët e Elbasanit për shkak të dy aksidenteve të ndodhura gjatë paradites si pasojë e mjegullës dhe terrenit me lagështirë nga reshjet e dendura të shiut.
Aksidenti i parë u regjistrua në segmentin Elbasan-Tiranë në vendin e quajtur “Qershitë” në afërsi të fshatit Petresh.
Burime nga vendngjarja thanë për korrespondentin e agjencisë NOA se shkak për këtë aksident u bë përplasja e një automjeti të tipit Benz me targë El 2728 C i drejtuar nga 26 vjeçari Renato Kusi me fugonin me targë Gr 028 A i drejtuar nga shoferi 55 vjeçar Qani Kullolli.
Si pasojë e kësaj përplasjeje janë lënduar drejtuesi i automjetit Benz Renato Kusi, shoferi i fugonit Qani Kullolli si dhe dy udhëtarë që ndodheshin në fugon 49 vjeçarja Safete Hasa dhe 66 vjeçarja Diana Veliu, banuese në qytetin e Gramshit.
Mësohet se fugoni i drejtuar nga Qani Kullolli udhëtonte në drejtim të Tiranës, ndërsa automjeti tip Benz kthehej për në Elbasan dhe përplasja sipas hetimeve paraprake të policisë rezulton të jetë shkaktuar nga mjegulla e dendur që kishte përfshirë zonën si dhe terreni rrëshqitës për shkak të reshjeve.
Por, në qarkun e Elbasanit është shënuar edhe një tjetër aksident, në segmentin e rrugës Elbasan-Peqin, në afërsi të komisariatit të Peqinit.
Burime nga vendngjarja bëjnë të ditur se një automjet tip Benz me targë TR 8353 L e drejtuar nga 48 vjeçari Bezat Xhepa është përplasur me automjetin me targë greke me KZH 9481 i drejtuar nga 46 vjeçari Pavlo Treska.
Si pasojë e përplasjes janë plagosur pesë persona, dy drejtuesit e automjeteve, bashkëshortja e 46 vjeçarit Treska dhe çifti Shyqëri e Drita Gjuzi që ktheheshin për në shtëpi nga Tirana, me makinën e drejtuar nga Bezat Xhepa.
Të pesë të lënduarit u dërguan menjëherë në spitalin e Elbasanit, dhe janë në gjendje kritike për jetën.
Policia edhe për këtë aksident pretendon se është shkaktuar nga humbja e kontrollit të automjetit nga drejtuesit e dy makinave, si pasojë e motit të keq me lagështirë.
mit/NOA