Ohër, 23 tetor, NOA - Gjykata e Ohrit vendosi sot masën e paraburgimit prej tetë ditëve për dy shtetasit shqiptarë që dje u kapën në zonën kufitare të Maqedonisë, për kalim ilegal të kufirit dhe gjueti të paligjshme.
Sipas gjykatësit, dy shtetasit shqiptarë Iljaz Xhemollari dhe Artan Tabaku nga qyteti i Pogradecit, do të qëndrojnë në burgun e Ohrit, deri në vendimin e gjykatës që pritet të miratohet gjatë dhjetë ditëve të ardhshme.
Ata u ndaluan dje nga policia kufitare në afërsi të fshatit Labunishtë, teksa kishin dalë për gjueti dhe kishin hyrë në territorin e parkut nacional të Galiçicës në territorin e Maqedonisë.
Ministria e Brendshme dje bëri të ditur se në territorin në afërsi të pikës kufitare “Shën Naumi” ishin vërejtur grupi i gjuetarëve, shtetas shqiptar, të cilët më pas ishin tërhequr në territorin e Shqipërisë.
NOA-INA
