Halkidhiki, Greqi, 26 Tetor 2010 NOA – Gruaja e re që mbeti e vdekur nga goditja me thikë, është ekzekutuar nga i shoqi i saj i cili vetë ai denoncoi në polici krimin që sipas tij e zbuloi kur gjeti gruan të plagosur dhe kërkoi ndihmë mjekësore.
Korrespondenti i agjencisë NOA citon burime zyrtare policore në Halkidhiki të pohojnë se gruaja 34 vjeçare G.H., emigrante shqiptare me qëndrim të rregullt Greqi, është vrarë me thikë nga i shoqi i saj 33 vjeçar brenda në banesën e tyre.
Viktima dha frymën e fundit të shtunën, pak orë më vonë në qendrën shëndetësore Kasandrias ku u dërgua në gjendje kritike për jetën.
Ishte vetë i shoqi 33-vjeçar i gruas i cili telefonoi në qendrën shëndetësore dhe kërkoi ndihmë për të transportuar në urgjencë gruan e tij.
Në pak minuta, në banesën e çiftit, në lokalitetin Pevkohori të Halkidhikisë, mbërriti autoambulanca e cila transportoi të plagosurën.
Por vetëm pak orë më vonë, 34-vjeçarja humbi jetën në spital, me gjithë ndërhyrjen e mjekëve që po përgatiteshin ta dërgonin në spitalin e Selanikut për ndihmë më të specializuar mjekësore.
Bashkëshorti deklaroi për policinë se e kishte gjetur të plagosur, qëlluar me thikë në kraharor gruan e tij dhe menjëherë kërkoi ndihmën e spitalit.
Policia e ndaloi bashkëshortin e viktimës për të sqaruar rrethanat në të cilat ndodhi ngjarja, për të cilën ai tha se nuk ka gisht.
Por mbrëmjen e së hënës, bashkëshorti ka pranuar se ishte ai që i mori jetën të shoqes.
“Ne u grindëm të dy, unë u nxeha dhe e qëllova tre herë me thikë dhe e vrava”, ka qenë dëshmia e bashkëshortit, tashmë nën arrest.
I arrestuari përballet me akuzat e vrasjes, armëmbajtjes pa leje dhe përdorimit të armëve të ftohta si dhe me kallëzim të rremë.
n.s/NOA
