Lushnjë, 29 tetor, NOA - Partia Drejtësi dhe Unitet zhvilloi dje në Lushnjë një aktivitet madhështor me pjesëmarrjen e mbi 800 simpatizantëve në Pallatin e Kulturës “Vaçe Zela”.
Gjatë këtij aktiviteti, u prezantuan arritjet e PDU-së dhe të strukturave të saj në Lushnjë gjatë vitit të parë të ekzistencës së partisë. Në fjalën e tij, kryetari i Partisë Drejtësi dhe Unitet, Shpëtim Idrizi, theksoi se tashmë ka ardhur koha e bashkimit ndërmjet të gjithë patriotëve në mbarë Shqipërinë.
“Të gjithë patriotët shqiptarë duhet të bashkohen nën të njëjtën strehë, ashtu siç kemi bërë edhe ne sot në Lushnjë, - tha Idrizi, - dhe i bëj thirrje Partisë Drejtësi dhe Integrim dhe personalisht, Tahir Muhedinit që të bashkohen”.
“Ato që na ndajnë, janë shumë të pakta në krahasim me ato që na bashkojnë. I bëj thirrje Partisë për Drejtësi dhe Integrim dhe personalisht Tahir Muhedini që të bashkohemi”, tha Idrizi.
Nga ana e tij koordinatori i Klubit të Patriotëve të Rinj, Jetmir Salaj theksoi se të gjithë të rinjtë duhet të bashkohen me PDU-në, dhe me KPR-në, si një mënyrë për të marrë në dorë fatin e vendit.
“Të rinjtë më shumë se kushdo tjetër duhet të marrin në dorë fatin e Shqipërisë dhe prandaj ne do të punojmë që çdo i ri të bashkohet me Klubin e Patriotëve të Rinj”, tha Salaj.
Takimi në Lushnjë ishte në vazhdën e turit “Një vit PDU”, që nisi pak ditë më parë në Vlorë dhe do të vazhdojë në Firence të Italisë, Durrës, Delvinë, Sarandë, Fier, Elbasan, Bulqizë, Kukës etj.
n.e/NOA
