Bukosh, 18 nëntor, NOA - Në kuadër të shtrirjes së rrjetit të saj, Lëvizja Vetëvendosje! ka mbajtur dje disa tubime publike në fshatrat Budakovë dhe Bukosh të komunës së Therandës.
Tubimin në Budakovë e përshëndeti kandidati për deputet dhe anëtar i Vetëvendosje!, Glauk Konjufca, i cili e vuri theksin në dy pika, sovraniteti dhe ekonomia.
Ndërkohë që para të pranishmëve foli edhe kandidatja për deputete nga Lëvizja Vetëvendosje!, Alma Lama, e cila elaboroi pikat programore të Lëvizjes që ndërlidhen me drejtësinë.
“Mllefi i qytetarëve është rritur si rezultat i keqqeverisjes dhe implikimit të politikës në sistemin e drejtësisë. I vetmi shpëtim, në këtë aspekt është shmangia e politikës nga sistemi i drejtësisë”, theksoi Lama.
Në fund të tubimit qytetarët shprehen gatishmëri për t’u aktivizuar në Lëvizjen Vetëvendosje! fillimisht nëpërmjet anëtarësimit dhe themelimit të Këshillit për Zhvillimin e Pikës së Lëvizjes në Budakovë.
Takimi tjetër me qytetarë u mbajt po ashtu të mërkurën, në fshatin Bukosh të komunës së Therandës. Edhe këtu shumë qytetarë i priten kandidatët për deputetë nga Lëvizja Vetëvendosje!, Alma Lama dhe Glauk Konjufca. Pas prezantimit të programit të Lëvizjes nga ana e aktivistëve, u hap një debat i gjerë me bukoshasit rreth situatë së rëndë politike e ekonomike në Kosovë.
n.e/NOA
