Vlorë, 28 Nëntor 2010 NOA/ R.Bulku - Në ndeshjet e futbollit midis skuadrave të shqiptarëve të Shqipërisë, Malit të Zi, Maqedonisë dhe Kosovës në ditën e pavarësisë në Vlorë, fitues është shpallur KF Renova nga Tetova e ish-Republikës Jugosllave të Maqedonisë.
Në ditën e pavarësisë, Qyteti i Vlorës, qendra e festimeve të kësaj feste ka mikpritur për të dytën herë radhazi miniturneun e futbollit “Kupa e Pavarësisë”, mbështetur këtë vit nga operatori celular Plus i cili sponsorizon edhe kombëtaren për sezonin eleminator të Euro 2012.
“Kupa e Pavarësisë” një iniciativë e Federatës Shqiptare të Futbollit ka bashkuar në ditën e pavarësisë kombëtare në këtë miniturne futbollistë të disa skuadrave të shqiptarëve brenda dhe jashtë kufijve nga Shqipëria, Maqedonia, Kosova dhe Mali i Zi.
Konkretisht janë ndeshur mes tyre skuadrat e Besës së Kavajës si përfaqësuese nga Shqipëria, KF Renova nga Tetova e Maqedonisë, fituese e kampionatit maqedonas, KF Liria nga Kosova, fituese e Kupës së Kosovës dhe KF Otrant, ekip shqiptar nga Ulqini.
Në finalen e këtij miniturneu janë ndeshur KF Renova nga Tetova e Maqedonisë dhe KF Liria nga Kosova, ku fituese me rezultatin 1 me 0 është shpallur KF Renova nga Tetova e Maqedonisë.
Kupa e Pavarësisë shënoi edicionin e dytë radhazi dhe Federata Shqiptare e Futbollit parashikon ta shndërrojë këtë iniciativë në një traditë të përvitshme.
r.b/NOA
