Shkodër, 30 nëntor, NOA – Ndërsa përmbytjet e komunave të Shkodrës vazhdojnë të përkeqësojnë situatën në veri të vendit si rezultat i reshjeve të pandalshme të shiut, duke bërë që uji në disa zona si komunat Obot e Dajç të arrijë në mbi 1 m, ministri i Brendshëm Lulzim Basha i ka bërë thirrje banorëve të zonave të përmbytura të lënë shtëpitë e tyre dhe të evakuohen në zonat përreth.
Ministri i Brendshëm gjatë një takimi në prefekturën e Shkodrës ku mblodhi shtabin e emergjencës civile tha se përparësi imediate në këtë moment kur reshjet nuk ndalen është shpëtimi i jetëve njerëzore.
Ai theksoi se janë marrë të gjitha masat për evakuimin e banorëve, duke shtuar se shtabi i emergjencës do të inspektojë të gjithë zonat e përmbytura.
Kjo situatë është tashmë alarmante duke sjellë atmosferën e përmbytjeve të fillimvitit për shkak të reshjeve dhe shkarkimeve në hidrocentralin e Vaut të Dejës.
Janë mbuluar nga uji komunat Obot, Dajç dhe Ana e Malit, ndërsa është rritur ndjeshëm niveli i ujit në lumin Buna, i cili nga reshjet dhe prurjet e shumta ka dalë nga shtrati duke vërshuar nëpër rrugë.
Nga prurjet e mëdha janë përmbytur banesa të tëra dhe toka edhe pranë liqenit të Shkodrës, duke vënë në vështirësi edhe jetët e banorëve të zonës.Vijon...
mit/NOA