Tiranë, 15 Dhjetor 2010 NOA - Gazetari i njohur dhe Drejtori i Përgjithshëm i Tv Ora News Alfred Peza, largohet nga detyra në televizionin informativ të krijuar rreth tre vjet më parë.
Lajmi bëhet i ditur nga burime jozyrtare brenda këtij televizioni ndërsa nuk ka një komunikim me mediat mbi këtë largim nga pronari i Ora News.
Nuk ka të dhëna të qarta për shkaqet që çuan z.Peza të largohet nga posti i Drejtorit të Përgjithshëm të Ora News.
Peza drejtonte këtë televizion që kur ai u themelua dhe më tej pasi u ble nga biznesmeni Ylli Ndroqi.
Fillimisht Peza ishte kryeredaktor, më tej Drejtor i Informacionit dhe më pas Drejtor i Përgjithshëm.
Prej kohësh ai kishte nisur emisionet “Ora e Debatit” çdo të premte ku ftoheshin personalitete të rëndësishme dhe kohët e fundit edhe "Ora e Intervistës".
Dalja e fundit mediatike e tij ishte në minutat e para të ditës së sotme (e Mërkurë), kur z.Peza përshëndeti heqjen e vizave në emisionin “Start” të Ora News. Ai ishte i emocionuar teksa fliste për këtë ngjarje të shënuar për shqiptarët.
Nuk dihet nëse vendimi për largim nga detyra i Pezës është i pakthyeshëm, kjo mbetet të shihet në vazhdim.
e.r/NOA
