Beograd, 18 dhjetor, NOA – Zv/kryeministri Ilir Meta u takua dje në Beograd me presidentin e Republikës së Serbisë, Boris Tadiç, ku ndodhet me ftesë të tij për të marrë pjesë në Kongresin e Partisë Demokratike Serbe.
Numri dy i qeverisë shqiptare gjatë takimit me Tadiç, u ndalën gjerësisht në zgjerimin e marrëdhënieve mes dy vendeve, por takimi i zhvilluar dje pasdite mes dy politikanëve ka prekur edhe shumë çështje me interes të përbashkët.
Biseda u ndal gjerësisht në rritjen e bashkëpunimit në shumë fusha, veçanërisht shkëmbimit ekonomik mes të dy vendeve.
Tadiç e Meta kanë folur edhe për integrimin evropian të dy vendeve drejt familjes evropiane.
Gjithashtu, Tadiç duke inkurajuar Shqipërinë për reformat e bërë në drejtim të integrimit në BE, uroi Metën për liberalizimin e vizave.
Ndërkohë, kryetari i LSI-së do të jetë nesër i pranishëm në kongresin e Partisë Demokratike Serbe, ku do të jetë në mesin e pesë krerëve të delegacioneve të partive të huaj, anëtarë të Internacionales Socialiste.
Kreu i LSI-së do t’i drejtohet kongresit të kësaj partie me një fjalë të posaçme për të uruar zhvillimet e tij si dhe për të theksuar marrëdhëniet e mira mes dy vendeve dhe dy partive respektive..
Kjo është hera e dytë që Meta takohet me Tadiç brenda një viti. Më herët në postin e kreut të diplomacisë shqiptare, Meta zhvilloi një vizitë zyrtare në Beograd ku u takua edhe me kreu e shtetit serb.
n.e/NOA
