Prishtinë, 19 dhjetor, NOA- Në kuadër të reagimeve ndaj raportit të Dick Marti, Fondi për të Drejtën Humanitare në Kosovë kërkon nga organet përgjegjëse që menjëherë të fillojnë krijimin e një komisioni të pavarur për hetimin e të gjitha pretendimeve.
Në këtë raport ish-kreu i ekzekutivit Hashim Thaçi etiketohet si udhëheqës i kontrabandës me armë, drogë dhe organe njerëzore nga fillimi i luftës deri më sot.
Kërkesa e Fondit për të Drejtën Humanitare pason reagimet e indinjatës së shprehur nga Prishtina dhe Tirana zyrtare pas publikimit të raportit të hartuar nga senatori Dick Marti për Këshillin e Europës.
Komiteti Parlamentar i Asamblesë së Këshillit të Evropës ka miratuar projekt-raportin dhe propozim-rezolutën të cilën e ka përgatitur Dick Marty e Fondi kosovar për të Drejtën Humanitare thotë se këto akuza serioze kërkojnë reagim të menjëhershëm të organeve kompetente në Kosovë.
a.y/NOA