Shkodër, 23 janar, NOA - Në qytetin e Shkodrës u dorëzua dje autoriteteve lokale një konvoj me ndihma humanitare të Fondacionit “Behxhet Pacolli”.
Konvoji prej 4 kamionësh të tonazhit të rëndë, përmbante 100 ton koncentrat ushqimor për bagëtinë.
Prefekti i Shkodrës, Maxhid Cungu, njëherësh kryetar i komisionit të emergjencave, e falënderoi përfaqësuesin e këtij Fondacioni, Rrahim Pacolli, për ndihmën e dhënë dhe e njohu atë me ecurinë e situatës në këtë rreth të prekur rëndë nga përmbytjet, dhe veçanërisht me gjendjen e bagëtisë në këtë qark.
Në takim merrnin pjesë autoritete lokale të qarkut të Shkodrës, kryetari i komunës së Lezhës, Viktor Tusha, komunë që e ka shpallur zotin Bexhet Pacolli, qytetar nderi, vetëm para pak muajsh. Ai e konsideroi këtë kontribut të zotit Pacolli, si të parin në bashkëpunimin e kësaj zone me këtë personalitet të rëndësishëm të Kosovës.
NOA
