Tiranë, 8 shkurt 2011, NOA- Kryetari i Prezencës së OSBE-së në Shqipëri, Eugen Wollfarth u bën thirrje partive politike të respektojnë Kodin Zgjedhor dhe të propozojnë komisionerët zgjedhorë.
Ai theksoi se në bazë të Kodit Zgjedhor dhe të dekretit të Presidentit të Republikës, Komisioni Qendror i Zgjedhjeve duhet të vazhdojë urgjentisht me të gjitha përgatitjet e nevojshme për zgjedhjet e planifikuara për 8 maj 2011.
Ai vuri në dukje se asnjë nga partitë politike nuk ka arritur të përmbushë afatin zyrtar të 24 janarit 2011 për dërgimin e propozimeve për anëtarë të komisioneve zgjedhore.
“Jam jashtëzakonisht i shqetësuar në lidhje me problemet që po has aktualisht KQZ-ja. Nga 66 Komisione të Zonave të Administrimit Zgjedhor, vetëm 12 prej tyre janë ngritur pjesërisht brenda afatit të 7 shkurtit 2011,” tha Wollfarth për mediat.
Më tej ai shtoi se, “Një situatë e tillë tregon një shpërfillje të hapur për aspiratat demokratike të qytetarëve shqiptarë nga partitë politike. Unë u bëj thirrje partive politike të respektojnë të drejtën e qytetarëve për të votuar dhe për ta adresuar këtë çështje në mënyrë të menjëhershme, pasi dita e zgjedhjeve po afron.”
Sipas ambasadorit Wollfarth, këto hapa duhen ndërmarrë në mënyrë që të përgatiten siç duhet të zgjedhjeve për qeverinë vendore.
a.y/NOA
