Tiranë, 12 shkurt 2011, NOA- Partia Socialiste dhe Bashkimi për të Drejtat e Njeriut rrezikojnë të humbin komisionerët e tyre në komisionet zonale të administrimit të zgjedhjeve, nëse brenda një jave nuk dorëzojnë emrat e komisionerëve.
Ky vendim u komunikua ditën e sotme gjatë mbledhjes së Komisionit Qendror të Zgjedhjeve, i cili sërish e zhvilloi punën pa praninë e përfaqësuesve të opozitës.
Sipas KQZ-së, në rast se këto dy parti nuk i plotësojnë vendet bosh atëherë ata do të zëvendësohen nga përfaqësues të shoqërisë civile.
Vetëm Partia Demokratike dhe Lëvizja Socialiste për Integrim kanë dorëzuar emrat e komisionerëve brend afatit ligjor.
Afati për dorëzimin e propozimeve për komisionerët e KZAZ-ve ka mbaruar me 7 shkurt.
a.y/NOA
