Tiranë, 20 Shkurt 2011, NOA – Ndërkohë që në demonstratën e 18 shkurtit të opozitës Policia e Shtetit numëroi plot 7 mijë demonstrues të opozitës, pas mbylljes së koncertit festiv kushtuar 20-vjetorit të përmbysjes së regjimit diktatorial në Shqipëri, që u shënua më rrëzimin nga kryeqytetasit të monumentit të diktatorit komunist Enver Hoxha në qendër të Tiranës, Deputeti i Partisë Demokratike dhe Kryetari i Forumit Rinor të kësaj partie Gerti Bogdani deklaroi për mediat se në koncertin festiv morën pjesë mbi 300 mijë qytetare shqiptarë. “Mbi 300 mijë shqiptarë, të rinj e të reja festuan sot në koncertin madhështor të organizuar nga Forumi Rinor i Partisë Demokratike, FRPD, me rastin e 20 Shkurtit, 20 vjetorit të rrëzimit të bustit të ish-diktatorit Hoxha”, tha në një konferencë të posaçme për shtyp deputeti i PD-së.
Ai bëri me dije se kjo është shifra zyrtare e pjesëmarrjes në koncertin e sotëm, e përllogaritur nga FRPD si organizatore e koncertit.
Sipas Bogdanit qytetarët festuan në një atmosferë jashtëzakonisht festive 20-vjetorin e rrëzimit të simbolit të komunizmit në Shqipëri.
Po kështu sipas deputetit demokrat shqiptarët festuan sot edhe 20-vjetorin e çeljes së rrugëtimin europian të Shqipërisë.
Gjithashtu deputeti i PD-së falenderoi qytetarët për pjesëmarrjen e tyre në këtë festë të shqiptarëve.
mit/NOA
[media id=153 width=600 height=440]
