Prishtinë, 18 mars 2011, NOA – Beteja e Koshares e shënuar në përfundim të konfliktit në Kosovë do të përkujtohet edhe këtë vit nën kujdesin e presidentit të Kosovës. Presidenti i Kosovës Behgjet Pacolli zhvilloi sot një takim të gjatë dhe miqësor ku u diskutua për zhvillimet e përgjithshme në vend dhe sidomos për përgatitjet për shënimin e përvjetorit të Betejës së Koshares.
Në takimin me presidentin Pacolli merrte pjesë një delegacion i përbërë nga udhëheqës të Betejës së Koshares, të prirë nga Rrustem Berisha.
Sipas traditës, manifestimi “Ditët e Shqipes”, që organizohet çdo vit në shënimin e kësaj beteje të lavdishme të luftës së fundit në Kosovës, do të organizohet nën patronazhin Presidentit Pacolli.
Pacolli e pranoi me kënaqësi kërkesën që të përkujdeset për përkujtimin sa më dinjitoz të përvjetorit të Betejës së Koshares.
Manifestimi “Ditët e Shqipes” përfshin tre manifestime kryesore: shënimin e 9 prillit, datës kur u thye kufiri shqiptaro-shqiptar, 11 prillin, dita e rënies së Heroit të Kombit Agim Ramadani, dhe 19 prillin, dita e rënies së Heroit të Kombit Sali Çeku.
mit/NOA
