Prishtinë, 21 mars 2011 NOA - Është mbajtur sot mbledhja konstituive e Komisionit parlamentar për Mbikëqyrjen e Financave Publike, të cilën e ka kryesuar, Ali Sadriu, kryetar i komisionit. Komisioni përbëhet nga kryetari, dy zv/kryetarë (Ramiz Lladrovci dhe Murselj Halilji) si dhe gjashtë anëtarë.
Korrespondenti i agjencisë NOA raporton se anëtarët e komisionit kërkuan që të qartësohen kompetencat e komisionit në fjalë, duke kërkuar vijë ndarëse mes Komisionit për Mbikëqyrje të Financave Publike dhe Komisionit për Buxhet dhe Financa.
Kryetari i komisionit Ali Sadriu tha se Komisioni për Mbikëqyrjen e Financave Publike ka për obligim të shqyrtojë të dhënat nga auditimi i përgjithshëm, veçanërisht të dhënat nga Auditori Gjeneral. Anëtarët e komisionit po ashtu caktuan edhe takimin e mbledhjes së radhës që do të mbahet më 23 mars të këtij viti.
Në atë ditë, do të shqyrtohen dy pika të cilat janë të ngutshme: përzgjedhja e një auditori për auditimin e Zyrës së përgjithshme të auditorit, si dhe shqyrtimi i kërkesës për buxhet, gjatë vitit 2011, të Zyrës së Auditorit të Përgjithshëm. Anëtarët e komisionit u angazhuan se do të kenë në vazhdimësi bashkëpunim të mirë dhe të frytshëm, meqë nga puna e këtij komisioni varet kualiteti i raportit i cili do t’i prezantohet seancës së Kuvendit.
Madje, u theksua se të dhënat dhe rekomandimet e raporteve që do të përgatiten për Kuvend, do të punohen në mënyrë profesionale.
a.b/NOA
