Mitrovicë, 31 mars 2011, NOA – Policia e Kosovës përmes operacionit të koduar “Kodra 1” sekuestroi rreth dy kilogramë substancë narkotike, e llojit heroinë si dhe arrestoi katër persona të dyshuar për përfshirje në trafikimin e lëndëve narkotike. Operacioni nisi në fshatin Tërnavc të komunës së Skenderajt, ku policia ndaloi një veturë e gjatë kontrollit të saj gjeti nën sendiljen e pasagjerit rreth 28.1 gram heroinë.
Gjatë këtij aksioni policia e Kosovës arrestoi tre shtetas kosovarë Sami Rr., Avni P. dhe Esat A.
Po kështu aksioni i policisë së Kosovës ka vijuar edhe në Mitrovicë, ku policia urdhëroi bastisjen e shtëpisë së të dyshuarit Kreshnik N. në Pejë.
Në shtëpinë e tij u gjetën e sekuestruan 1.496 gramë heroinë, 3065 përzierës për rritjen e sasisë së heroinës, një Ak-47 , 30 fishekë, shirit ngjitës, dy peshore dixhitale, rreth 509 gramë sasi e dyshuar që shërben për rritjen e sasisë së heroinës.
Policia e Kosovës bën me dije se pasi është marrë në pyetje i dyshuari Kreshnik N. nga Peja ai është arrestuar si një nga personat e përfshirë në trafikimin e lëndëve narkotike.
Këto operacione policore janë zhvilluar me autorizimin dhe mbikëqyrjen e Prokurorit Publik të Qarkut në Mitrovicë.
Sipas policisë së Kosovës hetimet në fjalë janë pjesë e operacioneve zinxhir.
Ndërkohë që policia vijon operacionin për zbulimin e personave të tjerë të përfshirë në këtë trafik narkotikësh.
mit/NOA
