Tiranë, 4 prill 2011, NOA - Policia e Tiranës flet zyrtarisht për plagosjen e kryeinspektorit të Policisë Ndërtimore Ardit Kaja, duke theksuar se është ngritur një grup hetimor që po merret me zbardhjen e ngjarjes së rëndë të ndodhur në mes të kryeqytetit.
Policia e Tiranës bën me dije se shefi i Ndërtimores Ardit Kaja u plagos sot në orën 09.25, në Bulevardin “Dëshmorët e Kombit” në afërsi të Ministrisë së Bujqësisë.
Sipas policisë Kaja është plagosur me armë zjarri në brendësi të automjetit të tij.
Zëdhënësja e policisë Alma Katragjini nënvizoi se 37-vjeçari Ardit Ramadan Kaja ka marrë plagë në këmbë dhe po merr ndihmën mjekësore në Spitalin Ushtarak dhe momentalisht ndodhet jashtë rrezikut për jetën.
Policia e Tiranës thekson se pas plagosjes së Kajës kanë mbërritur menjëherë në vendngjarje oficerë të Policisë për Hetimin e Krimeve të Rënda, ekspertë Kriminalistë, të cilët sikundër bëhet me dije kanë bërë të mundur sigurimin dhe këqyrjen e vendit të ngjarjes, duke mbledhur dhe administruar provat.
Policia njofton se për hetimin e kësaj plagosjeje po heton një grup i posaçëm hetimor, që po merret me proçedurat e shoqërimit të personave, marrjes në pyetje dhe veprimeve të tjera hetimore, në bashkëpunim me Prokurorinë e Tiranës.
Katragjini tha se policia do të japë informacione të mëtejshme për çdo ecuri të hetimit, për zbardhjen e motiveve, identifikimin dhe kapjen e autorëve.
mit/NOA
