Tiranë, 6 Prill, NOA - Ministria e Financave prezanton sot projekt-ligjin për amnistinë fiskale në komisionin parlamentar të Ekonomisë dhe Financave.
Përmes kreut të këtij dikasteri, Ridvan Bode, deputetët e këtij komisioni do të njihen me të gjitha opsionet që përmbahen në këtë projekt të qeverisë.
Konkretisht, bëhet fjalë për faljen e detyrimeve të papaguara të biznesit, e cila u premtua nga qeveria do të bëhet brenda këtij viti.
Para pak ditësh, ministri i Financave Ridvan Bode është takuar me përfaqësues të komunitetit të biznesit dhe ekspertë të ekonomisë për të diskutuar këtë nismë, përpara dorëzimit të saj në Kuvend.
Nga ana e saj, sipërmarrja private ka kërkuar që amnistia të jetë e plotë dhe gjithëpërfshirëse, pra që prej saj të përfitojnë jo vetëm bizneset, por edhe qytetarët që duan të legalizojnë pasurinë e tyre. n.e/NOA
