Tiranë, 19 prill, NOA – Në lidhje me incidentin elektoral të radhës, të ndodhur në Sukth ditën e djeshme, policia e Tiranës bën me dije se ka mundur të identifikojë dhe arrestojë autorin kryesor të tij.
Siç bën me dije për agjencinë e Lajmeve NOA, personi i ndaluar është Albert Hoxha, 32 vjeç, banues në Sukth, ndaj të cilit tashmë rëndon vepra penale e Kanosjes, dëmtimeve të tjera me dashje, prishjes së rendit e qetësisë publike, si dhe armëmbajtjes pa leje.
Nga ana tjetër, filloi procedimi penal në gjendje të lirë edhe për këta persona: G.Donshi, 37 vjeç; D.Muharremi, 37 vjeç; F.Meziu, 35 vjeç; që të tre banues në Sukth të Durrësit.
Personat në fjalë, akuzohen për veprat penale të kanosjes, dëmtimeve të tjera me
dashje dhe prishjes së rendit e qetësisë publike.
Ata do të ndiqen penalisht për përfshirje në ngjarjen e ndodhur dje rreth orës 17.20 në Sukth, ku dy grupe simpatizantësh u konfliktuan me njëri-tjetrin për shkak të vendosjes së shenjave identifikuese të subjekteve përkatëse elektorale.
Nga ana e policisë, vazhdon puna në drejtim të sqarimit të plotë të rrethanave të kësaj
ngjarje.
n.e/NOA
