Tiranë, 22 prill, NOA – Ambasadori i Bashkimit Europian në Tiranë, Etore Sequi ka deklaruar sot se duhen veprime konkrete nga Shqipëria në lidhje me plotësimin e 12 rekomandimeve të Brukselit për integrimin e vendit.
Në një konferencë të organizuar nga Ministria e Integrimit për përmbushjen e kritereve dhe ndikimin që ka shoqëria civile në këtë proces, Sequi ka theksuar se procesi i integrimit duhet të përfshijë të gjitha hallkat e një shoqërie.
“BE e konsideron pjesëmarrjen e shoqërisë civile si një gjë shumë të rëndësishme
Besojmë se procesi integrimi është një përpjekje e gjithë shoqërisë dhe gjithë elementëve të saj”, tha sot përfaqësuesi i BE në Tiranë.
Sequi ka vlerësuar dhe kontributin e ministres së Integrimit, Majlinda Bregu në lidhje me angazhimin për informimin e opinionit mbi procesin e integrimit në Bashkimin Europian.
a.k/NOA
