Vlorë, 2 maj 2011, NOA- Ministri i Brendshëm Bujar Nishani gjatë ditës së sotme u ndal në qytetin e Fierit dhe Vlorës për të rekomanduar strukturat e policisë lidhur me masat që duhen marrë për ruajtjen e rendit dhe sigurisë në zgjedhjet e 8 majit.
“Në këto zgjedhje duhet të dëshmoni profesionalizëm dhe integritet të lartë në zbatimin e ligjit, e po kështu të jeni shembullorë në etikën tuaj personale në komunikimin me qytetarët”, u shpreh Nishani.
Më tej deklaroi me bindje se punonjësit e policisë do të dinë të përmbushin detyrat e përcaktuara për garantimin e një klime të qetë e të sigurtë për të gjithë qytetarët.
Ministri i Brendshëm u kërkoi drejtuesve të policisë që të mos lënë jashtë vëmendjes shqetësimet e qytetarëve, si dhe u kërkoi atyre që të marrin masa për parandalimin e veprave penale.
Më tej ai i porositi drejtuesit e strukturave policore të thellojnë edhe më tej bashkëpunimin me institucionet e tjera ligjzbatuese me qëllim rritjen e efikasitetit të luftës kundër kriminalitetit.
a.y/NOA
