Tiranë, 9 maj 2011, NOA/ Ariola Ymeraj - Rreth orës 03.00 ka filluar numërimi i vullnetit të qytetarëve në Vendet e Numërimit të Votave, nga ku pritet të dalin edhe fituesit dhe drejtuesit lokalë të të gjithë Shqipërisë.
Sipas kryetarit të Komisionit Qendror të Zgjedhjeve, Arben Ristani, tashmë e gjithë puna është në duart e komisionerëve në Vendet e Numërimit të Votave. Ai theksoi se në disa prej VNV-ve në rang kombëtar procesi i numërimit të votave ka filluar.
Ndërkaq në dy deklaratat e tyre të mbrëmjes së diel, kryesocialisti Edi Rama dhe rivali i tij për Bashkinë e Tiranës Lulzim Basha pavarësisht euforisë, nuk pranuan të deklarojnë se si janë raportet mes tyre në preferencat e votuesve.
Ndërsa nga ana e Komisionit Qendror të Zgjedhjeve deri në orën 19.00 u raportua se pjesëmarrja e votuesve në rang vendi kapte shifrën e 50.9% të popullsisë, dhe në kryeqytet kap shifrën 47%, tashmë duket se do të duhen rreth 2 ditë për t’u orientuar qartë se në cilën anë do të anojë peshorja e votës së shqiptarëve.
E ndonëse ka kaluar kohë nga mesnata ende vazhdon procesi i transportit të kutive të votimit drejt Vendeve të Numërimit të Votave.
Sakaq në selitë e dy partive më të mëdha në vend, asaj Socialiste që luan për të katërtën herë figurën e kryetarit të saj Edi Rama dhe në atë të Partisë Demokratike e cila pret të shtjerë në dorë edhe Bashkinë e Tiranës, ankthi ka pushtuar selitë e të dy kampeve.
a.y/NOA
