Tiranë, 9 maj 2011, NOA- Ndonëse shifrat dhe rezultatet e votimeve të ditës së djeshme kanë ardhur në rritje, dy bashkitë kyçe për të kuptuar përfundimisht se cili kamp do ngrejë kupën e Fitores, Durrësi dhe Tirana kanë ende punë për të bërë.
Ndërsa Edi Rama pak orë më parë u shpreh i kënaqur nga rezultatet e deritanishme, nga ana e kandidatit të maxhorancës për bashkinë e kryeqytetit Lulzim Basha nuk është dhënë asnjë deklaratë.
E në fakt nga minuta në minutë, çdo gjë përmbyset e në mos përmbyset, avantazhi i Ramës ndaj Bashës duket se po zvogëlohet, çka duket se e prish hera-herës edhe buzëqeshjen e kreut të selisë rozë, lidhur me deklaratat e dhëna para kohe për fitore.
Nuk janë të pakta qendrat ku po numërohen votat, ku raportohet lodhja apo përgjumja e komisionerëve dhe e numëruesve, çka duket se do e zgjasë më tepër se parashikimet rezultatin në dy qytetet vendimtare dhe vota duket se do flejë të paktën edhe sot në kutitë e votimit.
Ndoshta numri i madh i votuesve në Tiranë, bën që kjo kohë të jetë më e gjatë, por ajo që nuk dihet saktësisht se kur do përfundojë epopeja e shfletimit të fletëve që mban të përzgjedhur një emër, ndoshta atë të fituesit.
a.y/NOA
