Tiranë, 10 maj 2011, NOA Update – Vëzhguesit ndërkombëtarë të OSBE-ODHIR-it në raportin e tyre paraprak për zgjedhjet vendore të 8 majit vërejtën me shqetësim se klima e polarizuar politike nuk do të kontribuojë për një qeverisje të mirë vendore.
Vëzhguesit vërejtën me shumë pozitivitet se procesi i votimit kaloi qetë, përveç disa problemeve jo të mëdha.
Vëzhguesit ngritën gjithashtu shqetësimin për tejzgjatjen në kohë të procesit të numërimit të votave si dhe për situatën e tensionuar politike nën të cilin po ndodh ky proces.
Përtej këtij shqetësimi ata theksuan gatishmërinë e tyre për të ndihmuar përfaqësuesit vendorë.
“Ne jemi befasuar në mënyrë pozitive nga vendimi i votës, ne mendojmë se votimi është organizuar mirë, pavarësisht disa problemeve”, tha njëri prej vëzhguesve në raportimin paraprak, i pari pas zgjedhjeve të 8 majit.
Sipas vëzhguesve ndërkombëtarë që kanë parë nga afër procesin e votimit në të gjithë vendin, gjatë ditës së zgjedhjeve kishte atmosferë të mirë e bashkëpunuese mes anëtarëve të komisioneve të qendrave të votimit, krahasuar me situatën e tensionuar mes forcave politike gjatë fushatës zgjedhore.
Më tej vëzhguesit ndërkombëtarë të ODHR-it vërejtën se kodi zgjedhor shqiptar është i mirë, por ai ka boshllëqe lidhur me zgjedhjet vendore.
mit/NOA
