Kabala, 15 maj 2011, NOA - Autoritetet shëndetësore në Uganda deklaruan sot vdekjen e një vajze 12 vjeçare si pasojë e infektimit nga sëmundja e Ebolas.
Viktima ndërroi jetë në një spital ushtarak në zonën e Luveros, 40 km në veri të qytetit Kabala.
Sipas autoriteteve shëndetësore, rasti i sëmundjes me ebola u vërtetua pas kryerjes së analizave të hollësishme.
Për këtë arsye 33 persona, që kanë qenë në kontakt me vajzën 12-vjeçare janë vendosur në karantinë.
Pas bërjes publike të identitetit të vajzës, autoritetet dhanë detaje edhe mbi simptomat e sëmundjes epidemike.
Bëhet fjalë për shenja si hemorragji, temperaturë e lartë dhe diare.
Ekipi kombëtar për përballimin e epidemive ka kaluar në gatishmëri numër 1, pas identifikimit të rastit të parë me sëmundjen e ebolas.
Në të gjitha qendrat shëndetësore janë instaluar grupe të specializuara për diagnostikimin dhe trajtimin e rasteve të dyshuara.
Vendi afrikano-lindor është përballur dy herë me rënien e epidemisë së ebolas.
Rasti i parë u shënua në vitin 2000 në Ugandën veriore, ku si pasojë humbën jetën 170 persona, ndërsa u trajtuan 400 persona.
Rasti i dytë ndodhi 4 vjet më parë në Ugandën perëndimore me më shumë se 20 të vdekur dhe dhjetëra të tjerë të prekur nga epidemia.
mit/NOA
