Tiranë, 17 maj 2011, NOA – Deputetët e Partisë Socialiste qëndrojnë të palëkundur në vendimin e tyre për të mos u larguar nga salla e mbledhjeve të Komisionit Qendror të Zgjedhjeve ku janë stacionuar prej disa orësh në pritje të shpalljes së rezultatit për Tiranën.
Por, edhe pse zëdhënësi i KQZ-së Arti Lushi i bëri thirrje pak më parë forcave të Policisë së Shtetit të vendosin qetësinë në mjediset e KQZ-së duke nxjerrë nga salla e mbledhjeve deputetët, këta të fundit nuk tuten nga vendet ku qëndrojnë ulur.
Forcat e policisë, të cilat kanë rrethuar mjediset e KQZ-së kanë hyrë para pak minutash edhe brenda institucionit për të nxjerrë jashtë deputetët socialistë.
Madje efektivët e policisë u lexuan atyre urdhrin e KQZ-së, por deputetët u shprehën se do të qëndrojnë aty, pasi kreu i KQZ-së po përpiqet të bllokojë rezultatin.
Sipas socialistëve ata do ta kontestojnë me forcë vendimin dhe u shprehën se nuk tremben nga ndërhyrjet e llojit fashist.
Policia ndërhyri pas kërkesës së KQZ-së, se në sallën e mbledhjeve duhet të marrin pjesë vetëm përfaqësuesit e KQZ-së, të partive, vëzhguesit e akredituar si dhe përfaqësuesit e mediave.
Por, pas qëndrimit të vendosur të socialistëve për të mos lëshuar sallën e mbledhjeve të KQZ-së edhe forcat e policisë janë tërhequr për të mos shkaktuar incident.
Deputetët socialistë kanë mësyrë në sallën e KQZ-së, edhe pse ky institucion ka vendosur që mbledhja e radhës do të jetë të mërkurë në oren 10.00.
mit/NOA
