Gjirokastër, 27 maj 2011, NOA- Paraditen e sotme në Drejtorinë e Policisë së Qarkut Gjirokastër është bërë prezantimi i shefit të ri të Komisariatit të Policisë së këtij qyteti.
Neritan Islamukaj do të drejtojë efektivat e Gjirokastrës, për periudhën në vijim, pas urdhrit të Drejtorit të Përgjithshëm të Policisë së Shtetit.
Më herët këtë post e mbante Kryekomisar Hasan Hasanaj, i cili u largua nga detyra me kërkesën e tij për arsye familjare.
Drejtori i Policisë së Qarkut Gjirokastër Emri Vata, para efektivave të policisë së këtij qyteti prezantoi të sapoemëruarin, duke shprehur vlerësim edhe për punën e ish shefit të Komisariatit zotin Hasanaj.
Në vijim ai ka kërkuar bashkëpunim dhe më shumë angazhim nga strukturat e drejtorisë dhe komisariatit për të mbështetur shefin e ri të komisariatit, me qëllim realizimin sa më mirë të objektivave të policisë Gjirokastër.
Nga ana e tij shefi i ri i Komisariatit të Policisë Gjirokastër ka premtuar një bashkëpunim dhe angazhim për të punuar së bashku.
Mësohet se deri para emërimit në këtë post Nertian Islamukaj mbante detyrën e Specialistit për Menaxhimin e Personelit në Drejtorinë e Përgjithshme të Policisë së Shtetit.
Sakaq në këtë prezantim ishte i pranishëm edhe Shefi i Njësisë Rajonale për Qarkullimin Rrugor Gjirokastër Kryekomisar Luan Shehaj.
a.y/NOA
