Bulqizë, 23 gusht 2011, NOA/Rid Bulku – Në pritje të përgjigjes për kërkesat e tyre, minatorët e Bulqizës janë tubuar pranë hyrjes së kompanisë koncensionare ACR në Bulqizë.
Afro 700 minatorë të Bulqizës po protestojnë për zvarritjen e nënshkrimit të marrëveshjes nga kompania austriake me pretekstin se nuk do në tryezën e marrëveshjes kreun e Konfederatës së Sindikatave, Kolë Nikollaj.
Ndërkohë minatorët thanë shprehimisht se nuk nënshkruajnë marrëveshje pa praninë e Nikollajt.
Mosarritja të hënën e marrëveshjes me administratorin e kompanisë austriake Giga Bedineishvili i ka irrituar edhe më shumë minatorët.
Pas ngujimit nën tokë për plot 27 ditë grevë urie në galeritë e rrezikshme të minierës së Bulqizës, ata ende nuk kanë arritur marrëveshjen e shumëkërkuar për plotësimin e kërkesave jetike, si rritjen e rrogës me 20 përqind, përmirësimin e kushteve të sigurisë në punë, uljen e moshës së pensionit, etj.
Administratori Bedineishvili deklaroi se nuk është dakord t’u paguajë pagën e plotë për dy muajt e protestës së tyre, ndërkohë që kjo është një prej kërkesave të minatorëve.
Minatorët i kanë kërkuar ndihmë shtetit, por në pritje të mbërritjes së saj ata nuk kanë mundur ende të takohen me ministrin e Punës, Çështjeve Sociale dhe Shanseve të Barabarta, Spiro Ksera.
Ndoshta ky takim nuk ka ndodhur për shkak të pushimeve të verës.
Minatorët kërcënuan se nëse marrëveshja me ACR-në nuk arrihet as të martën, atëherë ata do të ngujohen rishtas në grevë urie që për afat përmbyllës do të ketë vetëm momentin e zyrtarizimit të marrëveshjes.
mit/NOA
