Nju Jork, 22 shtator 2011, NOA – Në kuadër të Sesionit të 66-të të Asamblesë së Përgjithshme të OKB-së bashkëshortja e Sekretarit të Përgjithshëm të OKB-së zonja Ban Soon-Taek dha një pritje për bashkëshortet e krerëve të shteteve dhe qeverive që marrin pjesë në Asamble. E pranishme në këtë pritje ishte dhe zonja e kryeministrit, Liri Berisha. Gjatë kësaj pritjeje zonja Berisha pati një bisedë të përzemërt me zonjën e parë të SHBA-ve Mishel Obama, zonjën Ban Soon-Taek, zonjën Erdogan etj. Në biseda u vlerësua kontributi i zonjës Berisha në ndihmë të fëmijëve në nevojë dhe fëmijëve me autizëm në Shqipëri. Zonja Berisha shprehu domosdoshmërinë e një bashkëveprimi mbarëbotëror për të të nxitur dhe stimuluar kërkimet shkencore për shkaqet e këtij ç’rregullimi si dhe për t’u ardhur në ndihmë familjeve që vuajnë pasojat e autizmit. Kjo gjeti mirëkuptimin e bashkëbisedueseve. Zonja Berisha i shprehu zonjës Obama mirënjohjen dhe falenderimin për ndihmën që SHBA-të i kanë dhënë dhe vazhdojnë t’i japin Shqipërisë. Zonja Berisha ftoi zonjën Obama dhe zonjën Ban Soon-Taek për të vizituar Shqipërinë, ftesë, që u mirëprit nga të dyja zonjat. mit/NOA
Në foton e parë: Zonja e parë e SHBA-ve, Mishel Obama, bashkëshortja e kryeministrit, Liri Berisha
Në foton e dytë: Bashkëshortja e Sekretarit të Përgjithshëm të OKB-së, Ban Soon-Taek
