Vlorë, 21 dhjetor 2011, NOA- Një sipërfaqe toke prej 500 metër katrorë në lagjen “24 maji” në qytetin e Vlorës, ka çuar mbas hekurave dhe ka gjobitur Strati Xhelilin nga Dukati.
Burime zyrtare nga Prokuroria thanë për agjencinë e lajmeve NOA.al, se regjistrimi i kësaj sipërfaqe dyshohet se është kryer duke mashtruar zyrtarët shtetëror duke përdorur dokumentacion të falsifikuar për marrjen e lejes së ndërtimit.
Lidhur me këtë rast ditën e sotme është dhënë vendimi i Gjykatës së Vlorës, ku Xhelili u shpall fajtor për veprën penale të “Falsifikimit të dokumenteve”.
Ai u cilësua fajtor edhe për veprën tjetër penale “Pastrim të produkteve të veprës penale”, ku nga të dyja veprat u dënua me 5 vjet burg dhe 2 milionë lekë gjobë.
Mësohet se dokumentet për të marrë leje ndërtimi në emër të tij dhe vërtetimet për sheshin e ndërtimit u konsideruan të falsifikuara dhe iu dërguan institucioneve përkatëse për ndryshimet dhe shënimet në dokumentet e deklaruara të falsifikuara.
a.y/NOA
